Gipatay sa tanod

CEBU, Philippines - Usa ka mag-uuma ang namatay human giingong gipusil sa silingan nga tanod sulod sa iyang pinuy-anan sa miaging alas-7 pasado sa gabii didto sa Tupas sa lungsod sa Ronda.

Si Lorie Mirafuentes, 36, namatay diha-diha human mahiagom og duha ka samad pinusilan sa ulo, samtang ang gitumbok nga suspetsado mao si Romulo Pasiol, 37, tanod sa nahisgutang barangay.

Si PO1 Benjie Garcia sa Ronda Police Station mitug-an nga natulog ang biktima sa dihang gisaka sa suspek dayon giablihan ang pultahan ug gipusil kini makaduha ka higayon sa ulo.

Matud ni Garcia nga sigun sa ilang nakuhang impormasyon naglalis sa sayo pa ang biktima ug ang suspek. Apan nagdumili pagtug-an ang suspek human sa iyang pagtahan kun unsay ilang gilalisan sa biktima. (BANAT NEWS)