CEBU, Philippines - Naluwas sa mga awtoridad ang pito ka minor de edad nga babaye nga gipasangil nga gibugaw sa usa ka babaye ug bayot sulod sa usa ka videoke bar sa gihimong entrapment operation sa kapolisan niadtong milabay’ng gabii.
Ang hiniusang pwersa sa Presinto 5 sa Opao Police Station, Department of Social Welfare and Development (DSWD)-7 ug International Justice Mission (IJM) mironda sa maong videoke sa dalan Plaridel sa barangay Alang-Alang sa maong dakbayan human makadawat og impormasyong adunay mga batang babayeng gigamit sa prostitusyon sa maong dapit.
Ang gidakop mao ang tagdumala nga bayot ug ang bugaw nga babaye (mga pangalan gipugngan) gikatakdang pasakaan og kasong kalapasan sa Republic Act 9208 kon Anti Trafficking in Persons Act of 2003.
Si Inspector Wilson Abot, hepe sa Presinto 5 sa Opao Police Station dihang nahinabi sa Banat News miingon nga ang maong mga menor de edad pabayran og P2,000 aron makighilawas sa mga kustomer.
Atol sa pagdakop usa ka police decoy ang gigamit kinsa maoy nakigsabot sa tagdumala ug sa bugaw nga bayot aron mokuha og pito ka babaye. Matud pa ni Abot nga P7,500 ang nasabutang presyo aron madala sa gawas ang maong mga babaye.
Tuod man, human dawata sa duha ang kwarta dali silang gidakop ug gisalbar ang pito ka mga minor de edad nga mga bata.
Sa nasayran nga niadtong miaging tuig susamang matang sa establisamento gihapon ang gironda diha sa A.C. Cortes Avenue sa barangay Ibabao sa maong dakbayan ug mga babaye nga minor de edad ang nasalbar ug nadakpan uban usab ang bayot nga bugaw. (BANAT NEWS)