Polis nadasmagan patay

CEBU, Philippines - Usa ka retiradong polis ang namatay samtang nag-jogging kay nadasmagan sa usa ka nagbaguros ug hit and run nga awto didto sa dalan Alcantara sa barangay Sambag Uno, ning dakbayan sa Sugbo kagahapon sa alas 6:00 sa buntag.

Ang biktima mao si SPO4 Bu Montejo Cumbis, 55, kinsa miretiro sa serbisyo sa miaging Enero 29, ning tuiga.

Si Cumbis maoy nadestino isip desk officer ug imbistigador sa Mabolo Police Station sa iyang pagretiro.       

Si SPO4 Cumbis, minyo, nga taga Sambag Uno, wala na matabang pa sa mga doktor sa Chung Hua Hospital gumikan sa pagkalamba sa ulo niini sa sementadong karsada human masabak sa usa ka Nissan Sentra nga nagtangag sa plakang ZNH-317.

Hinuon nailhan ang ngalan sa drayber niini nga si Allen Balaba nga taga sitio Ylaya, Tigbuyawan, Ayongon, Negros Oriental.

Si PO2 Edgardo Vecoy, imbestigador sa City Traffic Operation Management (Citom) nga nahinabi sa mga tigbalita nagkanayon nga ilang na-trace ang sakyanan sa Land Transportation Office human mosibat si Balaba.

Subay sa nakuha nga rehistro sa sakyanan, rehistrado kini sa Servier Philippines Incorporated nga nagbase sa No. 2 Onion Mercedes St., Makati City.

Si Balaba usa ka family driver sa pamilyang Melche Cabdor ug padayon kining   gipangita sa kapolisan human biyai   ang sakyanan niini sa bakanteng lugar sa sitio Tambisan, La Paloma Subdivision sa barangay Tisa.

Si Lucilito Kyamko, bayaw sa biktima nga nahinabi sa mga tigbalita nagkanayon nga giingnan sila sa doktor nga ilang tabangon si Cumbis sulod sa usa ka oras apan nakabsan gyud sa iyang kinabuhi.

Si Kyamko miingon mga 20 minutos una pa nila nadala sa tambalanan ang biktima sanglit ang mga tawong nag-alirong kaniya sa nahitaboan wala makaako pagdala sa tambalanan gumikan sa kahadlok.

Matud ni Kyamko nga giingnan siya sa mga doktor nga kun nadala palang dayon si Cumbis hayan ila kining maluwas.

Si Kyamko nagkanayon nga wala pa sila masayod unsa gyud ang namatyan sa iyang bayaw sanglit wala pa nila makuha ang death certificate sa tambalanan apan sa iyang nakit-an sa biktima miagas ang dugo sa ilong ug dunggan niini.

Subay sa pasiunang imbestigasyon ni Vecoy nasayran nga nag-jogging ang biktima daplin sa dalan Alcantara paingon sa may V. Rama.

Matud pa niya nga segun sa nakasaksi nagbaguros nga nagpadagan si Balaba nga nag - zigzag sa karsada niadtong higayona hinungdan nga maayong pagkaigo sa biktima diha sa walang bahin sa sakyanan.

Dugang nahipos nga impormasyon sa kapolisan giingong gikan pang naghatud si Balaba sa iyang amo nga si Cabdor didto sa pier area.

Nagdali kining mibalik sa La Paloma kay magkuha unta sa anak ni Cabdor aron ihatud ngadto sa tunghaan dihang nakadasmag kini.

Matud ni Vecoy nga ilang susihon si Balaba usa ba ka empletado sa Servier Phil’ Incorporated samtang ila nang giandam ang kasong Reckless Imprudence Resulting to Homicide batok ni Balaba.  - BANAT NEWS