2 nalumos sa managlahing lugar

CEBU, Philippines - Duha ka tawo ang nalumos sa nagkalainlaing kadagatan sa lalawigan sa Sugbo sa miaging adlaw.

Ang mga biktima mao sila si Gomercindo Toring Bandalan , 40, ulitawo, ug amang, kinsa drayber sa traysikad , nga taga sitio Takan, barangay Ibabao, lungsod sa Cordova ug Marcelino Nuñez, hingkod nga taga barangay Can-asujan, dakbayan sa Carcar.

Si Bandalan giingong naligo kining hubog nga nag-inusara didto sa kadagatan sa Takan, samtang si Nuñez namasol didto usab sa kadagatan sa sitio Dunggoan, barangay Perrelos, Carcar.

Si SPO3 Teofilo Amodia sa Cordova Police mibutyag sa Banat News nga sa wala pa malumos si Bandalan, nakig-inom pa kini sa iyang mga amigo.

Unya mibiya kini sa grupo sa mga alas 10:00 ang takna sa buntag kay maligo ug dihang didto na kini sa dagat gipaundang sa inahan, apan wala gyud mopatuo, unya pipila ka gutlo giingong nawagtang lang kini sa dagat.

Nianang pagka-alas 2:00 sa hapon mipatim-aw na kini apan wala nay kinabuhi. Ang municipal health officer sa Cordova nga si Dr. Cristopher Calimbas mikonpirmar nga walay foul play ang pagkalumos sa biktima.

Samtang si Nuñez giingong kauban sa iyang amigo nga si Joseph Baylon nga namasol sa kadagatan sa Dunggoan.

Apan matud pa ni Baylon nga distansya ang matag usa kanila samtang nagpaabot nga tukbon ang ilang pasol sa isda dihang namatngonan niya nga milutaw nalang og kalit si Nuñez nga wala nay kinabuhi.

Gisakwat dayon niya kini ug gihatod ngadto sa Carcar District Hospital diin kini ideklarar nga patay na.

Si SPO1 Joel Pananganan sa Carcar City Police nagkanayon nga dili nila hisayran ang hinungdan sa pagkalumos niini hangtod nga mahuman sa pag-autopsy ang patay’ng lawas sa biktima. - Darrel A. Carumba ug Lesley Caminade Vestil/WC (BANAT NEWS)