Dumpit nabalaka sa iyang seguridad sa CCJ

CEBU, Philippines - Maayo ra ang unang gabii sa kontrobersyal nga pulis nga si SPO1 Adonis Dumpit diha sa Cebu City Jail apan nabalaka ang iyang mga kanhi labaw sa Cebu City Police Office.

Matud ni Dumpit wala siya makuyawi sulod sa CCJ apan nabalaka gyud siya sa iyang seguridad.

Atol nga gibalhin siya niadtong Lunes sa hapon, si Dumpit nakadungog og mga singgit sa mga piniriso nga nagkanayon nga ‘ari na diri kay patyon tika.’

Si Sr. Insp. Dennis Aliño, Deputy Jail Warden for Administration sa CCJ nga nahinabi sa mga tigbalita nagkanayon nga wala gyud sila makaandam niadtong Lunes sa kinalit nga pagbalhin kang Dumpit diha kanila.

 Gihulagway ni Aliño nga high risk prisoner si Dumpit tungod sa mga posibleng hulga sa iyang kinabuhi sa ubang mga piniriso diha sa City Jail apan gipasalig hinuon niyang walay ‘VIP’ treatment nga madawat si Dumpit.

Dili pa usab tugutan si Dumpit nga makasuroy sa basketbolan sulod sa compound tungod sa peligro.

Apan nadismaya ang deputy city director for operation nga si Supt. Pablo Labra II tungod sa pagbalhin ngadto sa CCJ ni Dumpit.

Gihulagway ni Labra nga nabutang gyud sa peligro ang kinabuhi sa maong polis tungod kay daghang mga inmates nga mga dinakpan ni Dumpit nga nabalhog sa maong institusyon.

Gikunsiderar ni Labra nga usa ka maayong polis ug ‘dedicated’ kini sa iyang propesyon si Dumpit ug makadaghang higayon na niining gisugal ang iyang kinabuhi tungod ug alang sa iyang trabaho.

Si Labra nagkanayon nga dili lang basta mga ordinaryong kriminal nga gipamutlan ni Dumpit og ‘sungay’ nga natanggong sa maong bilanggoan kondili lakip ang mga miyembro sa mga dagkong sindikato sama sa Mindanao Robbery Group.

Si Dumpit nabilanggo tungod sa kasong pagpatay kang Ronron Go ug ang inahan niini nga si Janet Badana mipasaka og petisyon sa korte nga ibalhin si Dumpit sa CCJ tungod kay nasakpan niya kining naggawas-gawas ra sa detention cell sa Criminal Investigation and Detection Group (CIDG).  - BANAT NEWS