Nanghagis sa silingan napatay sa retiradong polis

CEBU, Philippines - Usa ka 49-anyos nga lalaki nga gipasanginlang nakainom ug nanghagis sa iyang mga silingan ang namatay human gipusil sa iyang silingan nga usa ka retiradong polis kagahapon sa buntag diha sa sitio Villa Remedios sa barangay Kalunasan ning dakbayan.

Wala na madala pa sa tambalanan si Panfilo Monteciano, 49, human matusak-tusak sa bala sa kalibre .45 nga pistola sa retiradong polis nga si Vivencio Elorde, 56.

Si Elorde boluntaryong mitahan sa mirespondeng kapulisan lakip ang iyang armas. Ang mga sakop sa Homicide Section pinangulohan ni SPO3 Rey Cuyos nakapunit og upat ka kabhang sa kalibre 45 nga bala ug duha ka deformed slug ug usa ka 12-pulgadas nga kutsilyo diha sa crime scene.

Si PO3 Ruth Violango, usa sa mga imbestigador sa maong kaso nga nahinabi sa Banat News mibutyag nga sa wala pa mahitabo ang pagpamusil nagkalalis ang biktima ug ang suspek.

Gikatahong gibadlong ni Elorde si Monteciano apan giingong wala kini mopatuo ug nagbitbit og kutsilyo hinungdan nga napusilan.

Ang biktima nakaangkon og tulo ka samad pinusilan diha sa iyang dughan nga maoy nakaingon sa iyang hinanali nga kamatayon.

Si Elorde kinsa miretiro sa serbisyo sa PNP niadto lang Hunyo sa miaging tuig ug katapusan niyang assignment diha sa Regional Personnel Holding Center sa Police Regional Office-7.

Si Elorde nga nahinabi sa Banat News mitug-an nga gikan siyang natulog niadtong higayona ug nakamata siya sa dihang milagubo gawas sa ilang balay.

Sa dihang iya kining gisusi iyang nakit-an nga gibundak sa biktima ang bangko hinungdan nga iyaha kining gibadlong apan mibawos pagtubag ang biktima nga wala siyay (suspek) labot kay iya ra kining arte.

Matud niya nga sa iyang paggawas iya na daang giluklok ang iyang armas nga .45 nga pistola. Ang balay sa biktima ug sa suspek makab-ot ra sa kamot diin ang dalan ra maoy nakauwang niini.

“Ni warning shot ko, kay mibunot man siya, ako siya giingnan ayaw lagi, mibunot man gyud mao ‘to akong gisuwayan ilog ang kutsilyo, unya nagpasalba ko, ako gusto ako i- paralyzed siya (biktima) apan naapiki nako kay nag-inilogay lagi mi sa kutsilyo unya dili nako kadagan kay sakit akong arthritis mao ‘to akong napusilan,” dason pa ni Elorde.

Si Elorde mipakita hinuon sa kapulisan sa iyang certification sa paghupot sa maong armas sanglit wala pa niya makuha ang lisensya niini.  - BANAT NEWS