Auxillary police tukoron

CEBU, Philippines - Ang chairman sa Police Coordinating and Advisory Council (PCAC) nga si Romeo Cordova naglaraw nga motukod og auxiliary police sa siyudad alang sa pagpalig-on pag-ayo sa puwersa nga mobantay sa kalinaw ug kahusay.

Matud pa ni Cordova nga makatabang kaayo ang maong grupo sa pagsanta sa nagkadaiyang krimen kay matag lugar nga kanunay mahitaboan og mga krimen destinohan man og mga polis.

Dugang pa niya nga nagbaha ang mga Criminology graduate nga walay trabaho ug sila maoy potensyal nga himoong auxillary police gumikan kay nakaagi na sila og nagkadaiyang training sa eskuwelahan.

Dugang pa ni Cordova nga gitun-an na nila karon ang pagpanaod og daghang CCTV camera sa nagkadaiyang kadalanan sa siyudad aron dali nga mamonitor ang sitwasyon sa dakbayan ilabi na kung may mga panghitabo.

Nasayran nga matag CCTV camera, mokantidad og P200,000 ngadto sa P300,000.

“Didto sa Davao, migamit na pud sila og CCTV camera, hinaut nga makabuhat sad ta ani sa atong lugar,”matud pa ni Cordova.

Samtang si Mayor Michael Rama miuyon nga butangan gyud og CCTV camera ang nagkadaiyang dapit ning siyudad kay gawas sa pagmonitor sa sitwasyon, makatabang usab kini sa pagsuta sa sitwasyon sa trapiko.  - BANAT NEWS