$20 mil bawion sa Intsik

CEBU, Philippines - Gipaubos na sa pagdungog ang tinguha sa duha ka mga Intsik nga makuha ang 20 mil dolyares nga nakumpiskar sa Bureau of Customs sa tugpahanan sa MCIA sa milabay’ng semana.

Matud pa ni Cebu Customs District Collector Atty. Ronnie Silvestre kanunay mobisita kaniya ang mga Chinese nationals nga sila si Iek Man Wong ug Xiu Yu Tan aron sa pakig-areglo nga makuha ang 20 dolyares nga ilang nakumpiskar.

Apan matud pa niya nga di kini basta nalang nila iuli sanglit nakalapas ang duha sa “Central Bank Act” nga nagdili sa pagdala og susama kadako nga kantidad sa salapi sa usa ka pasahero.

Matud pa niya adunay legal nga proseso alang sa pagkuha niini ug kini pinaagi sa hearing diha sa buhatan sa Legal Division sa BOC uban sa hearing officer nga si Atty. Edward James Dybuco.

Gikatahong mipadala og suwat sila so Iek ug Xiu ngadto ni Silvestre nga miesplikar nga ang matag usa kanila maoy nanag-iya sa tag 10 mil dolyares apan kay nagkuyog man sila maong ilaha lang kini giipon diha sa bag ni Iek.

Giingong gibutyag usab diha sa maong suwat nga 60 mil dolyares ang ilang salapi apan pag-abot nila sa Macau ilang gideposito sa bangko ang 40 mil dolyares human sila masayod nga 10 mil dolyares lamang ang gitugot sa Pilipinas nga dad-on sa usa ka langyaw.

Apan si Capt. George Maccarobo ang Sector Commander sa Customs Police sa Customs Sub-Port of Mactan mipadayag nga dakong kalapasan sa balaod sa Customs ang dili pagdeklarar sa salaping cash nga dala sa usa ka langyaw sa ilang “Customs Declaration Sheet.”

Kahinumduman nga si Iek ug Xiu gipugngan sa BOC ug Philippine Drug Enforcement Agency-7 tungod sa nakit-ang tulo ka kilong unang gidudahang ‘ephedrine’ nga sagol sa paghimo og shabu apan negatibo kini.  - BANAT NEWS