Seguridad sa estudyante pahugtan - Gullas

CEBU, Philippines - Si Kongresista Eduardo Gullas sa unang distrito sa probinsiya sa Sugbo kagahapon miawhag sa tanang pampublikong tunghaan ubos sa iyang distrito nga pahugtan ang seguridad sa mga estudyante ilabi na nga ang midagit ug mipatay sa 6-anyos nga si Ellah Joy Pique nagpabilin pang gawasnon.

Sa gipahigayong press conference kagahapon sa buntag diha sa buhatan ni Gullas sa University of the Visayas mibutyag kini nga naestorya na niya ang tanang mga supervisor sa mga tunghaan kabahin sa seguridad.

Matud niini nga kinahanglang mag-hire gyud og mga security personnel aron makabantay.

Kahinumduman nga si Pique gidagit kini niadtong Pebrero 8, 2011 atol sa pagpamuhi niini sa ilang klase sa Calajoan Elementary School sa lungsod sa Minglanilla.    

Ang patay’ng lawas sa bata napalgan na lang kini pagkasunod adlaw ngadto sa barangay Guibuangan, lungsod sa Barili.

Si Gullas nanawagan usab ngadto sa mga awtoridad nga tutukan og maayo ang imbestigasyon sa kaso ug palig-unon gyud ang mga ebidensya batok sa mga suspetsado aron dili masama sa unang hitabo nga ang manag-uyab nga si Sven Erik Berger ug Karen Esdrelon nga gisikop apan gibuhian kini tungod sa kahuyang sa mga ebidensiya. (EIM)   (BANAT NEWS)