CEBU, Philippines - Mibahad nga molusad og lihok protesta ang kahugpungan sa mga mananagat dinhi sa Sugbo pinaagi sa dili pagpangisda sa tibuok adlaw karung petsa 31 karung bulana tungod sa nagsunod nga pagsaka sa presyo sa produktong petrolyo.
Ang Panaghugpong sa mga Gagmay’ng Mananagat sa Sugbo kon Pamana-Sugbo pinaagi sa chairman niini nga si Victor Lapaz mipadayag nga nakahulga sa produksiyon sa isda dinhi sa nasud ilabi na sa Sugbo ang way hunong nga pagsaka sa presyo sa lana. Gibasehan ni Lapaz ang grupo sa mga mananagat nilang sakop didto sa lungsod sa Dalaguete nga makagasto og labing minus upat ka litro nga gasolina sa tag P60 ang litro sa ilang pump boat sa matag pagpanagat apan dunay mga higayon nga usa lang ka kilo nga tamarong nga isda ang makuha niini sa kantidad nga P80 ang kilo.
Giangkon ni Lapaz nga pagkakaron wala na silay kapaingnan gawas sa paglusad sa fish strike batok sa oil price hike nga gitawag nila og “No Fish Day.” (/EIM) (BANAT NEWS)