Drug pusher nakaipsot

CEBU, Philippines - Nakaipsot sa kapolisan ang usa ka bag-ohay o ‘hilaw” pa nga mamaligya-ay og ginadiling drugas sa lungsod sa San Remegio dihang nakabantay kini sa nagsingabot nga kapolisan kagahapon.

Ang kapolisan sa lungsod sa San Remegio uban sa sakop sa Philippine Drugs Enforcement Agency ug Provincial Anti-Illegal Drugs Special Task Group miadto sa balay ni Arman Sinadjan Tipontipon aron pagsilbi sa search warrant nga giluwatan ni Judge Soliver Perras sa RTC-7, Branch 10.

Apan napakyas ang kapolisan pagsilbi sa maong warrant kay miikyas si Tipontipon human kini makabantay sa kapolisan nga nagpadong na sa ilang balay.

Apan sulod sa balay sa maong suspetsado, nakuha sa kapolisan ang nagkalainlaing putos sa gituohang shabu.

Gawas sa mga pakete sa gituohang shabu nakuha usab sa kapolisan ang 20 ka mga digital weighing scale, lima ka hand rolled aluminum foil, usa ka kalibre. 45, ug uban pang drug paraphernalia.

Nasayran sa kapolisan nga sa wala pa sila maabot ang suspetsado didto sa likod sa ilang balay kay mitubag sa sugo sa lawas maoy hinungdan nga nakita niini ang nagdang-danga nga mga polis busa mikabad kini og dagan..

Sa pakighinabi sa Banat News ni PO2 Herman Bulawit sa San Remegio Police kini mibutyag nga hilaw pa kaayo sa maong negosyo ang suspetsado kay bag-ohay lang kining misulod ning maong patigayon.

Gani dili palang dugay nga ila kining gi-surveillance pagsuta sa tinuod niining bisyo.