CEBU, Philippines - Gisuportahan sa kagamhanan sa siyudad sa Sugbo ang pagsaulog karon sa nasudnong Women’s Month ug gihingusgan ang mga proyekto alang sa kababayen-an.
Naglinya ang mga kalihukan sa mga organisasyon sa kababayen-an sa siyudad sa nagkadaiyang barangay.
Sumala pa ni Konsehal Leah Japson nga mipahigayon sila og mga libreng seminars sa kababayen-an aron pagpahimagno kanila sa ilang mga katungod.
Ang Cebu City Women and Family Affairs Commission nanawagan usab sa publiko nga kinahanglan nga patas ang pagtratar sa kababayen-an.
Samtang ang executive director sa Lihok Filipina nga si Tessie Fernandez mipahibalo nga saulogon usab sa tibouk kalibutan ang International Women's Day busa dunay ipahigayon nga dakong parada ugma sa udto nga magsugod sa Osmeña Blvd. paingon sa Plaza Sugbo.
Modumala usab ang siyudad og nagkadaiyang livelihood programs sa nagkadaiyang barangay aron makahulma og panginabuhian ang mga inahan nga wala nagtrabaho gumikan sa pag-atiman nila sa ilang mga anak.
Gihingusgan usab ang pagpatuman sa Republic Act 9710 or The Magna Carta of Women nga naghulagway sa patas nga pagtratar sa mga kababayen-an. - BANAT NEWS