Taga Talamban padugang og polis
CEBU, Philippines - Mihangyo ang mga opisyales sa barangay Talamban sa Cebu City Police Office nga dugangan og 10 ka mga polis ang Station 8 aron higpit nga mabantayan ang seguridad sa maong dapit.
Ang maong presinto miserbisyo sa walo ka mga barangay nga naglangkob sa Agsungot, Bacayan, Binaliw, Budlaan, Pit-os, Pulangbato, San Jose ug Talamban.
Ang kopya sa resolusyon kalabot ning maong hangyo gipadala na ngadto sa City Hall ug kang Cebu City Police Director Ramon Melvin Buenafe.
Sa maong resolusyon gipadayag sa konseho sa Talamban ang nagkagrabeng krimen nga nahitabo sa ilang lugar nga naglakip sa walay hunong nga kawat nga nakapabalaka na pag-ayo sa katawhan.
Ang pagdugang og polis usa sa mga gipanglantawan nila nga maoy makapahunong sa maong mga krimen sa ilang dapit.
Gusto usab sila nga adunay police visibility kanunay sa mga lugar diin kasagarang mahitabo ang krimen.
Sa laing bahin, miduso og resolusyon si Association of Barangay Council President Michael Ralota ug konsehal Augustus Pe Jr. aron amendahan ang ordinansa nga nag-umol sa Police Coordinating and Advisory Council (PCAC).
Sa maong resolusyon ilang gihangyo nga ilakip ang direktor sa Philippine Drug Enforcement Agency isip miyembro sa PCAC aron mapitol ang mga namatigayon og ginadiling drugas ug ang mga tiggamitan niini.
Sa pagka-karon, ang PCAC gilangkoban sa mayor, mga direktor sa Department of the Interior and Local Government – 7, National Police Commission – 7, National Bureau of Investigation – 7, tsirman sa Committee on Public Order and Safety sa konseho, ABC President, pipila ka mga sakop sa Armed Forces of the Philippines, CCPO Chief, City Fire Marshal ug mga representante sa Bureau of Jail Management and Penology ug Cebu Chamber of Commerce and Industry. - BANAT NEWS
- Latest
- Trending
