TF Ellah Joy hadlok mabulilyaso pag-usab

CEBU, Philippines - Nag-amping na karon ang Task Force Ellah Joy Pique sa pagdali-dali og pagawas og mga report kabahin sa dagan sa ilang imbestigasyon sa maong kaso human sa nahitabong gihulagway nga ‘hilaw’ nga unang kasong gisang-at nga nabasura ra sa piskalya.

Kagahapon sa buntag, gioktaba ang gipatawag untang press conference kabahin sa update sa maong imbestigasyon diha sa Police Regional Office-7 apan wala ibutyag ang hinungdan.

Apan adunay close door meeting sa task force nga gihimo kagahapong adlawa nga posibleng may kalambigitan sa kalamboan sa pagsulbad sa maong kaso.

Sa pakighinabi sa Banat News sa tigpamaba sa task force, Sr. Supt. Patrocinio Comendador kinsa maoy hepe sa Regional Investigation Division wala mohimakak apan wala moangkon kabahin sa report nga adunay sakyanang gidudahang maoy gigamit sa pagsignit kang Pique nga narekober diha sa Naga.

Matud pang Comendador ilaha pa kining susihon ug iberipika sanglit buot nila nga adunay linagdaang pamahayag gikan sa mga saksi nga makasuporta sa ipagawas unya nilang updates.

Sa pagkakaron, ang task force mibahin-bahin sa ilang mga sakop aron pagkuha og dugang ebidensya ug ikasuporta sa ilang kaso batok sa gidudahan nila karong bag-ong mamumuno ni Pique.

Samtang sa pakighinabi usab sa Banat News sa kapitan sa Inayagan nga si Kapitan Boy Tablate mibutyag usab nga ang magtiayon nga tag-iya sa sakyanan wala na diha.

Ang duha nga tag-iya sa usa ka Pajero nga gidudahang maoy gisakyan sa pagdagit ni Ellah Joy gihulagway ni Tablate nga maayong tawo sa dihang bag-ohay pa silang nagpuyo sa maong barangay.

Apan tulo ka tuig na ang milabay, may migawas nga mga tabi-tabi sa silingan sa magtiayon nga pagdudang nalambigit ang duha sa malaw-ay nga negosyo diha sa internet tungod sa pipila ka mga kababayen-ang magsulod-gawas sa ilang pinuy-anan.

Sa laing bahin, ang inahan sa biktima nga si Ligaya Pique nga gikahinabi sa Banat News pabiling naglaom nga mahatagan og hustisya ang pagkamatay sa iyang anak ug iyaha na kining gisalig sa awtoridad.  - BANAT NEWS