CEBU, Philippines - Naputos sa samad pinusilan ang usa ka barangay kagawad human kini giligo og bala sa duha ka wala mailhing lalaki nga nagmotorsiklo pasado ala-una sa hapon sa miaging adlaw sa sitio Avocado barangay Lusong lungsod sa Tuburan.
Ang biktima mao si incumbent barangay kagawad Wenceslao Deñega, 48, kinsa gipusil sa duha ka lalaking luwan og motorsiklo nga nagtabon sa nawong.
Sa imbestigasyon sa kapolisan sa maong lungsod nasayran nga nag-inusarang nagbaklay ang biktima patubang sa ilang barangay hall apan pag-abot sa nahisgutang lugar kalit kining gipaulanan og bala.
Matud pa sa kapolisan nga ang mga mamumuno nag-atang nang daan sa maong dapit bisan samaran misuway pa unta og ligid sa iyang kaugalingon ngadto sa bakilid nga bahin ang biktima apan gipaulanan gihapon kini og bala sa mga mamumuno.
Human niini daling miikyas ang mga mamumuno apan adunay usa ka saksi nga nakakita sa hitabo ug nakahatag og ideya sa kapolisan sa dagway sa mga kriminal.
Ang biktima nakaangkon og tulo ka samad pinusilan sa iyang ulo ug usa sa tuong bahin sa iyang liog nga maoy giingong hinungdan sa hinanali niining kamatayon.
Sa pagresponde sa kapolisan nakuha diha sa crime scene ang lima ka kabhang sa kalibre .45, ug tulo ka deformed slug.
Matud pa ni PO2 Junyl Ater sa Tuburan Police nga gikahinabi sa Banat News ilang nasayran nga ang biktima adunay nakalalis nga molupyo gihapon sa maong barangay di palang dugay.
Nagtuo ang kapolisan nga nakasuhito ang mga mamumuno sa mga lakaw sa biktima ilabina kun asa kini mag-agian ug kung unsang orasa. - BANAT NEWS