P.6M nga cellphone nakawat

CEBU, Philippines - Mokabat kapin sa tunga sa milyon nga kantidad sa cellphone ug mga laptop ang nasakiyo gikan sa usa ka tindahan sa 138 Mall sa dalan Colon niadtong adlaw’ng Miyerkules.

Ang tindahan mao ang Bea Beauty Products nga gipanag-iya ni Bea Ang Tan, nga nahimutang sa 2nd floor sa maong mall.

Sa pakighinabi sa Banat News sa hepe sa Theft and Robbery Section, Chief Inspector Bonifacio Garciano miingon nga ang gwardiya sa maong mall uban sa sinaligan ni Tan nga si Corazon Medilo natingala sa diha nga daw abli na ang pultahan sa ‘Mang Inasal’ sa taas nga bahin niini.

Hinungdan nga dali dayun usab nga gisusi ni Medilo ang ilang tindahan ug diha nalang nila nasayrang nahanaw na ang 114 ka mga lain-laing klase sa cellphones nga nagbalor og kapin tunga sa milyon.

Lakip sa nahanaw mao ang duha ka laptops ug ang ubang mga kabtangan nga anaa sa maong tindahan nga nagbalor usab og singko mil.

Matud pa ni Garciano, ang maong gwardiya   samtang nangabli sila sa mall gikatingala nalang nila niini kay naabli na ang kandado sa Mang Inasal ug aduna usab silay nakit-ang mikaratil og dagan nga usa ka lalaki nga nakaikyas.

Midugang si Garciano nga ila pang susihon ug kun nganung nakasulod ang maong kawatan nga wala man silay nakitang forced entry sa main entrance sa maong mall.

Samtang nagduda usab ang tag-iya sa maong mall nga ang ilang gitangtang nga electrician ang posibleng mihimo niini ug dugang pagduda nga posibleng nagpabilin diha sa sulod ang kawatan aron masirad-an ug gitunong ang pag-eskapo pagpangabli. (BANAT NEWS)