CEBU, Philippines - Giklaro ni Dr. Cristina Giango sa Integrated Provincial Health Officer (IPHO) nga dili janitor ang mipaslak sa catheter sa kinatawo sa usa ka pasyente nga naglisod sa pagpangihi didto sa Bantayan District Hospital (BDH) kundili usa ka gitawag nilang Institutional worker nga ubos sa pagdumala sa usa ka doktor o nurse .
Ang pamahayag gihimo ni Giango tungod sa migawas sa mga pamantalaan nga usa ka janitor kuno ang mitaod sa maong catheter ngadto sa pasyente.
Dugang pa ni Dr. Giango nga una modangop ngadto sa BDH ang pasyente, tulo na ka adlaw nga gihilantan nga posibleng may infection sa iyang lawas, kay wala man siya makaihi.
Samtang si Gobernador Gwendolyn Garcia mihangyo sa mga tigbalita nga sutaon una nila ang ilang mga impormasyon nga makuha sa dili pa nila kini ipagawas sa pamantalaan .
Tungod sa nahitabo, usa ka opisyal sa Bantayan mitawag ngadto sa buhatan sa gobernadora ug mipadayag sa iyang kabalaka nga wala na unya’y mga doctor ug nars nga motrabaho sa BDH tungod kay ang ilang serbisyo alang sa publiko, gidudahan man hinuon sa katawhan tungod sa dili maayong pagkutlo sa balita. (BANAT NEWS)