Awto vs. motorsiklo duha angol

CEBU, Philippines - Naangol ang usa ka drayber uban sa iyang pasahero dihang kalit silang gidasmagan sa usa ka awto didto sa dalan V.L. Sanchez sa barangay Pagsabungan, dakbayan sa Mandaue kagahapon sa buntag.

Ang mga biktima mao sila si Pablito Bariga, 20,  ug Bonie Amtor ug pulos taga Pagsabungan, samtang ang drayber sa sakyanang midasmag kanila mao si Lloyd Darwin Moso, 23 .

Si SPO3 Eleazar Saromines sa traffic section sa kapolisan sa maong dakbayan nga nahinabi sa Banat News miingon nga paingon sa highway ang awto ug paingon usab sa barangay Pagsabungan proper ang habal-habal nga gimaneho ni Bariga.

Dugang pa niya nga ang awto mi-overtake sa gisundan nga traysikol ug didto nahapitan niini ang habal-habal nga gimaneho ni Bariga nga maoy hinungdan sa ilang pagkalagpot nga misangpot sa ilang pagkaangol.

Matud pa ni Saromines ang awto nga nawad-an usab og control misawom sa kanal ug dako usab ang kadaot nga nahiagoman niini.

Ang duha nga naangol dali nga gidala sa Eversely Child Sanitarium Hospital apan gibalhin kini sa Vicente Sotto Memorial Medical Center sa dakbayan sa Sugbo. (BANAT NEWS)