Kurapsyon sa AFP angay mabutyag-Sen. Trillanes

CEBU, Philippines - Positibo ang panglantaw ni Senador Antonio Trillanes IV sa padayung imbestigasyon sa Senado mahitungod sa kurapsyon diha sa armadong kusog sa nasud.

Si Trillanes nga nakighinabi sa mga tigbalita sa iyang pagbisita sa Sugbo kagahapon miingon nga angayang mahibaw-an kung may korapsyon ba gyud nga nahitabo.

“We can never dream of addressing the problem if we don’t even know that it exists or what is its extent,” nagkanayon si Trillanes. Si Trillanes kinsa usa ka kanhi opisyal sa Philippine Navy bag-ohay lang gimandong makagawas sa bilanggoan tungod sa mga kasong pag-alsa batok sa gobiyerno sa nanglabay’ng katuigan mipasangil kaniadto sa naghitak nga kurapsyon diha sa AFP.

Ang Senado ug Ubos Balay Balauranan mihimo na og ilang imbestigasyon kabahin sa pagpangawkaw sa pundo sa Armed Forces of the Philippines sa pipila ka mga heneral ilabi na ang mga kanhi chiefs of staff ug comptrollers sa maong ahensya. Pinaagi sa gihimong imbestigasyon, matud pa ni Trillanes nga ang resulta maoy mahimong giya sa pagpanday og mga solusyon alang sa pagsulbad sa maong problema.

Sa iyang bahin, si Trillanes miingon nga maningkamot siya nga matabangan ang administrasyon ni Presidenti Benigno “Noynoy” Aquino III pinaagi sa pagduso og mga balaudnon sa Senado nga masanta ang kurapsyon.

Sa iyang pagpakigtagbo sa mga lider sa Samahang Magdalo sa Kabisay-an kagahapon, usa sa tumong ni Trillanes nga magiyahan ang iyang mga sakop sa mga lakang nga ilang himuon sa umaabot nga mga adlaw.

“We intend to impart to all the members the direction, the vision in the future and the mission right now that needs to be addressed,” dugang pa ni Trillanes. (BANAT NEWS)