Lista sa CPPO chief andam na - Ontog

CEBU, Philippines - Gibutyag ni PRO-7 Chief Supt. Ager Ontog nga may listahan na siya sa mga opisyal nga iyang iduso sa buhatan ni Gobernador Gwendolyn Garcia aron maoy papilian niini ang mosunod nga hepe sa kapolisan sa probinsya.

Apan si Ontog nagdumili sa pagtug-an sa maong mga ngalan kay dili siya gustong taga media maoy unang masayud niini.

Hinuon giklaro ni Ontog ang kuwalipikado sa maong posisyon nga nagrangko og Senior Supt naglakip kang Sr. Supt. Patrocinio Comendador, hepe sa Regional Investigation and Detective Management Division (RIDMD), Sr. Supt. Mariano Natuel, hepe sa Police Community Relation (PCR) sa PRO-7 ug Sr. Supt. Edward Caranza, kanhi comptroller sa PRO-7.

Sumala pa ni Ontog nga ang gobernador makarekomendar usab sa gusto niyang opisyal nga mangulo sa Cebu Provincial Police Office (CPPO) ug ila kining iduso ngadto sa buhatan sa Senior Officer Placement Board (SOPB) sa Campo Crame.

Mipasabot si Ontog nga nagpadala siya og suwat ngadto sa Crame niadtong Lunes ug iyang girekomendar nga si Comendador maoy ihulip nga OIC kang Sr. Supt. Louie Oppus.

Matud niya nga si Oppus daghan kaayo og gimbuhaton sa rehiyonal nga buhatan ug dili mahimong magdugay siya sa CPPO tungod kay dili mahimong mabiyaan niya ang iyang trabaho sa iyang opisina.

Apan base sa kasaligang tinubdan sa Banat News nga si Comendador maoy napilian ni Garcia hinungdan nga gipa-apply ni Ontog si Comendador sa maong posisyon ngadto sa SOPB aron sa pag formalisar niini.

Sa sayo pa, ang gobernador mipadayag nga kinahanglang masayod siya sa mga ngalan nga iyang pilian aron duna na siyay matudlong OIC sa CPPO. (Rey B. Pasaporte/WC)

Custom way supak sa findings sa PDEA

Ni Bong Soriano

Wala supaka sa mga kadagkoan sa Customs Sub-Port of Mactan ug Customs Police ang resulta sa laboratory test nga negatibo sa "Ephedrine" ang nasakmit nga kemikal gikan sa duha ka mga Insek didto sa tugpahanan sa Mactan sa miaging adlaw.

Si OIC Collector Ester Nario ug Enforcement and Security Services (ESS) Sector Commander Capt. George Macarrobo sa buhatan sa Custom sa Mactan mipadayag sa dako nilang pagtahod sa maong resulta.

Apan gibati sila og pagduda sa maong resulta tungod wala sila magdahom nga ang tulo ka kilo nga keminal nga nasakmit nila gikan sa duha ka Insek klaro kaayo nga may ephedrine.

Apan igo ra sila sa pagduda kay matud pa ni Nario nga dili siya makakuwestiyon sa gipagawas nga resulta sa PDEA kay mao kini ang ahensiya nga maoy may katungod nga moila sa matang sa kargamento nga moabot sa tugpahanan.

Hinuon sa bahin ni Macarrobo, siya miingon nga maayo nalang nga ilang nahilngan ang maong kargamento ug napugngan, kay kun wala pa unya nakalusot  ang maong kargamento, sila maoy tawgong danghag.

Gumikan niini gitugyan ni Nario ug Macarrobo ngadto ni Cebu Customs District Collector Ronnie Silvestre kung iya bang supakon ang gipagawas nga resulta sa PDEA . (BANAT NEWS)