Bomb threat sa bus

CEBU, Philippines - Naglumba sa pagpanganaog ang mga pasahero sa Ceres bus dihang usa sa ilang kaubang babaye misulti sa drayber nga nakadawat siya og mensahe sa text nga dunay bomba ang maong bus nga ilang gisakyan.

Ang nahisgutang bus nga nagtangag sa plakang FWC-837 ug dunay body number nga 591 gipahunong sa drayber nga si Alejo Guarnes, 57, diha sa barangay Pakigne, lungsod sa Minglanilla pasado alas 7:00 kagahapon sa buntag aron makanaog ang iyang mga pasahero ug nanawag sa kapolisan.

Ang nahisgutang babaye nga nakadawat og text message mao si Jennifer Mangubat, 38, usa ka kawani sa Palace of Justice sa dakbayan sa Sugbo kinsa mibiyahe paingon ngadto sa Bacolod aron motambong sa haya sa iyang uyoan.

Apan si Mangubat nagdumili sa pagpa-interview sa mga sakop sa media kagahapon.

Si Guarnes sa pakighinabi sa mga tigbalita nagkanayon nga 20 ka tuig na siyang nag-drive og bus ug kagahapon maoy unang kasinatian niyang insidente nga dunay hulga sa bomba ang bus nga iyang gimaneho.

Matud ni Guarnes nga migikan sila sa North Bus Terminal mga alas 6:30 sa buntag ug pag-abot nila nanakay sa South Bus Terminal sa dakbayan sa Sugbo si Mangubat uban sa laing tulo ka pasahero.

Niadtong higayona dunay 21 ka mga pasahero ang maong bus apan pag-abot sa maong lugar misulti si Mangubat nga pahunongon siya kay nakadawat siya og mensahe nga dunay bomba ang bus.

Tungod niini nag-panic ang ubang pasahero ug mimando kang Guanes nga mohunong kay manganaog sila.

Si Chief Inspector Laurel Almerante, hepe sa Minglanilla Police Station daling mitawag sa bomb squad sa Cebu Provincial Police Office (CPPO).

Sa pagsusi sa mga bomb experts pinangulohan ni PO3 Reynaldo Solante inabagan sa bomb sniffing dogs sa Central Command nga gidala ni Staff Sargeant Gregorio Murillo walay nakitang bomba sa mga bagahe ug sa mismong bus.

Ang text gikan sa numerong 09066704404 nagkanayon: “ayaw mo ug sakay ana nga ceres bus kay dunay bomba.”

Si Supt. Rodolfo Albutra, hepe sa Provincial Intelligence Bureau sa pakighinabi sa mga tigbalita nagkanayon nga gitawag nila ang numero sa cellphone nga mipadala og mensahe kang Mangubat apan dili na kini ma-contact.

Matud pa ni Murillo bisan og dili sigurado kinahanglang trataron gyud kini isip hulga sa seguridad. Ang nasud dili palang dugay nakasinati og mga pagpamomba sa bus nga gidudahang mugna sa mga extortionist.

Ang bus gilauman nga maabot ngadto sa destinasyon mga alas 4:30-5:00 sa hapon kagahapon apan tungod sa tulo ka oras niining pagkalangan mga alas 8:00 na sa gabii kini maabot. - Ug Darrel Carumba/EIM (BANAT NEWS)