'Ephedrine' nga nasakmit sa MCIA negatibo daw sa ilegal nga kemikal

CEBU, Philippines - Gibuhian kagahapon sa Philippine Drug Enforcement Agency (PDEA) Central Visayas ang duha ka Chinese nationals ug gi-turnover ngadto sa Bureau of Customs (BoC) human ang nakuhang gidudahang ‘ephedrine’ nga nasakmit gikan kanila negatibo.

Base sa chemistry report sa Philippine Drug Enforcement Agency sa ulohang buhatan negatibo ang resulta ug walay presensya sa dangerous drugs ug controlled precursors ilabina sa kemikal sa paghimo og ilegal nga drugas ang maong pulbos nga nasakmit.

Si Philippine Drug Enforcement Agency-7 regional director Adrian Alvariño nagkanayon nga bisan tuod gawasnon na sila si Iek Man Wong, 55 ug Xuiyu Tan, 27, sa kaso sa drugas apan aduna gihapon silay himuong lawom nga imbestigasyon.

Ang kemikal nga nakumpiskar sa BoC ug PDEA giingong gikan sa Fujian Agriculture and Forestry University, usa ka public university sa Jinshan, Fuzhou, Fujian, China, nga gamiton sa enhancing ug preservative sa monggos.

Ang gikuhang sample iduso ngadto sa Food and Drugs Administration aron masusi kun unsay sagolan niining maong kemikal.

“We need to know if this powdery substance is used in food and if it is harmful to our health. Lisod na basin kita ang masakit,” matud pang Alvariño.

Atol sa gihimong field test nga gipahigayon sa BoC ug PDEA-7 nasuta nga dunay gidudahang dunay presensya sa ‘ephedrine’ apan gikinahanglan pa nila ang confirmatory test.

Matud ni Alvariño ang K-9 Dogs nagpakita og positibong reaksyon niadtong higayona sa dihang gisimhot niini ang kemikal apan matud niya nga ang reaksyon sa K-9 natural lamang tungod kay mao kini ang pag-train kanila.

 “Sometimes K-9 dogs can be wrong. There are some stimuli in the area like perfumes plus daghan pang tao ang nagagi-agi,” pasabot pang Alvariño. “Yung field test na yun is not conclusive, it is not enough to file a case,” matud pang Alvariño sa interbyu sa TV Patrol Central Visayas.

Apan giangkon niini nga ang reaksyon sa K-9 dogs naghatag kanila og kahigayonan pag-imbestigar apan sa hustong proseso.

“We are just doing our job and we have to be fair with them,” matud pa niya. Giklaro usab niyang walay nahitabong ‘switching’ sa ebidensya sanglit gidokumento ang tanan.

Ang PDEA-7 magpadayon sa ilang imbestigasyon ug mopahigayon og background check sa magtiayong Intsik pinaagi sa pakig-alayon sa ubang narcotic agencies sa laing kanasuran.

Apan sa sayo pa, si Cebu Customs District Collector Atty. Ronnie Silvestre nagkanayon mahimong mapasakaan og laing kaso ang duha gumikan sa pagdala og 20 mil dolyares sa nasud nga wala ideklarar ug kalapasan sa Central Bank Act. (BANAT NEWS)