Gidakdakan og mohon

CEBU, Philippines - Maayong pagkabuslot sa ulo sa usa ka ginang human kini gidakdakan og sementadong mohon pasado alas- 7 sa miaging gabii sa sitio Planta barangay Poblacion lungsod sa Medellin.

Ang biktima nailhan nga si Socorro Solon Montesclaros, 68, molupyo sa maong lugar samtang ang suspetsado nga gitumbok mao si Restie Mañalac, 34, molupyo usab sa barangay Poblacion sa maong lungsod.

Base sa inisyal nga imbestigasyon sa kapolisan sa lungsod sa Medellin nasayran nga ang biktima napalgan nalang sa iyang umagad nga nagbuy-od sa sala ug gitabunan na og habol ang tibuok lawas.

Matud pa ni Medellin police investigator SPO3 Carlos Condino nga sa wala pa nahitabo ang pagkakaplag sa patay’ng lawas sa biktima nahibulong na ang mga silingan niini nga wala kini mogawas-gawas nianang adlawa.

Kini maoy hinungdan nga ang umagad niini nga si SFO3 Judelino Almacen nga usa ka bombero gitawag sa mga silingan aron kini susihon ug mao nalay iyang nakit-an ang patay’ng lawas sa biktima.

Gisuwayan pa unta og dala ang biktima sa Medellin District Hospital apan gideklarar kini nga dead on arrival ug migawas sa paghiling sa lawas niini nga gihimo ni Dr. Jun Palilio nga ang hinungdan sa kamatayon sa biktima mao ang samad sa iyang ulo.

Samtang sa crime scene nakuha sa kapolisan ang usa ka sementadong mohon nga adunay gitas-on nga dose pulgadas nga daw dunay lama sa naugang dugo nga gidudahan sa kapolisan nga maoy gigamit pagpusdak sa ulo sa biktima.

Nasuta usab sa kapolisan nga nahanaw na niini ang pipila ka dukomento, alkansiya, titulo sa yuta ug cellphone niini maong nagduda silang tulis ang motibo sa krimen.

Mipasabot usab si Condino kun nganong si Mañalac ang ilang gitumbok nga suspetsado tungod usab sa mipatim-aw nga saksi nga nakakita kaniya nga diha sa crime scene sa wala pa madiskubrehi ang patay’ng lawas. Si Mañalac wala na igkita sa kapolisan atol sa ilang pagpangita. (EIM) (BANAT NEWS)