'Del Mar' minibus nakadasmag, drayber hubog way lisensya

CEBU, Philippines - Gumikan sa kahubog ug ingon man ang kapakyas pagpakita og lisensiya gitanggong ang driver sa usa ka “Del Mar” mini bus nga iya sa barangay Lusaran dakbayan sa Sugbu human makadasmag og traysikol sa barangay Suba- Basbas dakbayan sa Lapulapu sa milabay’ng gabii.

Ang nasikop mao si Danilo Apalla, 40, residente sa Lusaran gireklamo ni Francisco Degamo, drayber usab sa traysikol ug residente sa Suba Panas dakbayan sa Lapulapu.

Sa pasiunang imbestigasyon sa traffic division sa kapolisan sa Lapulapu nasayran nga gikan nangaligo og dagat ang mga kabanay ug pamilya ni Apalla gamit ang sakyanan sa barangay.

Pipila ka gutlo pag-abot sa maong dapit iyang nadasmagan ang traysikol ni Degamo hinungdan pagkaguba sa traysikol niini apan giingong mipadagan hinuon palayo si Apalla hinungdan nga gigukod.

Si Apalla dihang nadakpan sa kapolisan napakyas sa pagpakita sa iyang lisensya         gawas sa usa ka resibo ug giingong hubog usab kini.

Apan ang mga pasahero maoy nangangkon nga padaganon ang minibus tungod kay gibato sila sa mga tawo ug usa sa mga batang pasahero ang naigo sa ulo ug nasamad sa pagpamato. (BANAT NEWS)