Sakop sa gang tipi sa karibal

CEBU, Philippines - Usa ka sakop sa gang ang namatay human   gipusil sa duha ka gituohang sakop sa karibal nga gang nga nagsakay og motorsiklo sa miaging kaadlawon sa Dasco Road sa barangay Paknaan, dakbayan sa Mandaue.

Nadakpan hinuon ang mga suspetsado sa hot pursuit operation sa kapolisan nga pulos pa mga menor de edad nga nagpangidaron og 15-anyos nga taga Pulang Bukid sa barangay Alangalang ug 17-anyos nga taga sitio Abra sa samang barangay.

Ang napatay mao ang 17-anyos nga si Eldin Subingsubing, taga Zone Mongos sa barangay Paknaan sa maong dakbayan kinsa nakaangkon og samad pinusilan sa dughan ug kamot.

Si SPO1 Danilo Barrita sa kapolisan sa Presinto 3 sa Basak Police Station nga nahinabi sa Banat News miingon nga nakig-inom ang biktima sa pipila ka mga kaubang sakop sa ilang gang dihang miabot ang mga suspek ug namusil.   

Ang mga suspetsado daling mipabulhot og padagan sa ilang motorsiklo pahilayo sa maong dapit apan nailhan sila sa mga kauban sa namatay hinungdan nga sila natultulan ug nangadakpan. Gidala unta ang biktima sa tambalanan apan gideklarar usab sa mga doktor sa Eversely Child Sanitarium nga patay na. (BANAT NEWS)