Kolektor natulisa'g P30mil

CEBU, Philippines - Nasakiyo ang P30 mil nga koleksyon sa usa ka kolektor sa lending sa mga tulisang de motor didto sa barangay Lanas, siyudad sa Naga sa miaging hapon.

Ang biktima mao si Charlene Gentapa, 30, minyo, nga taga barangay Balirong, dakbayan sa Naga, kinsa kolektor sa AVOP lending company.

Si PO2 Cristino Canono sa Naga Police Station mibutyag sa Banat News nga ang biktima naglingkod sa waiting shed ug nagpaabot sa iyang mga customer dihang kalit lang mihunong sa iyang atubangan ang usa ka motorsiklo nga giluwanan sa duha ka wala hiilhing tawo.

Unya ang angkas niini maoy nanaog ug mideretso ngadto sa biktima dayong tion sa iyang armas de fuego ug mideklarar nga tulis. Ang biktima kinsa nahadlok nga mamatay, mihatag nalang sa iyang bag nga gisudlan sa P30 mil nga koleksyon.

Human madawat ang bag misakay kini og balik sa motorsiklo dayong sirit pahilayo sa maong lugar.

Padayon pang gisusi sa kapolisan ang maong hitabo. - BANAT NEWS