Bucao may napilian sa puli ni Biñas

CEBU, Philippines - Si Bise Mayor Alan Bucao sa dakbayan sa Talisay nagkanayon nga kung siya maoy mo desisyon sa pagpili og bag-ong hepe sa siyudad pili-on niya kadtong hepe nga mo implementar sa balaod nga walay dapigan.

“Ang ako ra kung qualification ang atong hisgutan ang ganahan nako kanang hepe nga mo-implement sa balaod no matter kinsay maligsan”, ni Bucao pa.

Si Bucao kinsa chairman usab sa komitiba sa kahapsay ug kalinaw nagkanayon nga naglaom siya nga ang siyudad makakuha og hepe sa polis nga sama og mga achievement ni Superintendent Henry Biñas.

Si Biñas milingkod hepe sa siyudad niadtong Nobiyembre 28, 2008 hangtud niadtong Pebrero 20 niining tuiga.

Ug sa maong termino niini isip hepe sa Talisay mikabat sa 80 porsyento ka mga malapason sa balaod lakip na niini si Joavan Fernandez nga sinagop ni Mayor Socrates Fernandez ang nasikop sa kapolisan ug napasakaan og kaso ngadto sa korte.

Matud ni Bucao nga duna siya’y napili-an sa lima ka mga ngalan nga pili-an nga mapuling hepe sa dakbayan sa Talisay nga giduso sa Cebu Provincial Police Office (CPPO) ngadto sa buhatan sa mayor apan wala niya ibutyag ang ngalan niini.

Ang mga opisyal nga giduso mao sila si Superintendent Eduardo Saavedra, Superintendent Teofilo Siclot Jr., Superintendent Elmer Lim, Superintendent Julian Entoma ug Superintendent Rodulfo Albotra.

Sa laing bahin, ang mayor wala pa mohatag og desisyon kung kinsay iyang pili-on sa lima ka mga opisyal nga mapuli kang Biñas.

Sa pagkakaron ang deputy sa Talisay City Police Station nga si Senior Inspector Errol Francis Deveyra mao pa ang officer-in-charge sa TCPS. - BANAT NEWS