Tandok gukdon sa gobyerno - Utlang

CEBU, Philippines - Mibahad si Dr. Alice Utlang, ang hepe sa Department of Veterinary Medicine and Fisheries (DVMF) nga gukdon niya kining mga Tandok nga nagpasigwar nga moayo sa pinaakan sa iro.

Ang Tandok maoy mga tawong nagpatuo nga makaayo sa tawong mapahitan og mga mananap nga rabison ilabi na sa iro.

Apan gipasidan-an ni Utlang ang publiko nga dili motuo sa Tandok aron dili mamatay sa rabies.

Sa pagkakaron gipakusgan nila ang kampanya bahin sa rabies kay ang buwan sa Marso gitawag nga Rabies Awareness Month.

Matud pa ni Utlang nga walay sayantipikanhong kamatuoran nga makapatay sa kagaw sa rabies ang Tandok busa dili sila maoy angayang dangpan sa mapahitan sa iro nga rabison.

Samtang si Regional Program Coordinator Jocelyn Tabotabo sa National Rabies Control Program sa Department of Health nagkanayon nga may 20 kapin ka mga Tandok ang namatigayon dinhi sa Rehiyon-7 ug duha niini naa sa barangay Inayawan ug Guadalupe sa dakbayan sa Sugbo .

Giawhag ni Tabotabo ang mga opisyal sa mga lugar sama sa Inawayan ug Guadalupe nga silay mobadlong sa mga tawo nga dili moduol sa Tandok sa panahong mapaakan sila og mananap nga rabison aron dili sila masugamak sa kamatayon.

“Kung mapaakan gani og iro, adto na lang gyud deretso sa animal bite treatment center aron matambalan dayon ang pasyente, dili ta angay magpadala anang Tandok,” sumala pa ni Tabotabo. - BANAT NEWS