Oppus mi-warning sa kapolisan

CEBU, Philippines - Si Sr. Supt. Louie Oppus Deputy Regional Director for Operation (DRDO) sa Police Regional Office-7 ug Officer in Charge sa Cebu Provincial Police Office mipasidaan sa hepe sa kapulisan sa kalungsoran ug dakbayan nga manubag ngadto kaniya sa higayon masakpang wala diha atol sa inspeksyon matag adlaw’ng Sabado.

Dugang ni Oppus nga ang hepe usab maoy manubag kaniya kun dunay mga sakop nga dili mosunod sa iyang kamanduan.

Nagkanayon siya nga ang iyang gibuhat karun dili kini para sa iyang kaugalingon kundili alang kini sa ilang pag-alagad ngadto sa katawhan sa probinsya.

 “As long as we are not doing ourself but for the good and welfare of the people of the province of Cebu,” matud pang Oppus kinsa midugang nga ang tumong ug tuyo niya mao ang efficiency sa mga pulis aron mahibalik ang pagsalig sa katawhan ngadto kanila.

Apan iyang giklaro nga ang mo-inspeksyon sa mga police station sa kalungsoran mao ang mga sakop sa Regional Staff diin kuyog na siya niini.

Siya mipatawag og command conference niadtong Martes sa tanang hepe sa kapulisan sa matag police station sa kalungsoran ug component cities ug iyang gipaabot ang mga guidelines nga iyang ipatuman samtang siya pa maoy OIC sa CPPO.

Dili lang Sabado nga anaa ang mga hepe sa Police station lakip na ang adlaw’ng Domingo mobisita sa merkado publiko sa ilang tagsa-tagsa ka area of responsibility ug magbutang og pulis nga naka-uniporme kay ang maong adlaw modagsa ang katawhan ug kun dunay masugatang problema ang katawhan duna dayon maduolan nga polis ug masumbongan sa ilang problema.

Ang mga hepe gimanduan niya nga matag semana dunay bisitahon nga usa ka barangay aron dunay masumbongan sa ilang mga problema. Matud ni Oppus nga mao kini iyang gihimo kaniadto ang pagbisita sa matag barangay sa iyang area of responsibility sa dihang nahimo pa siyang hepe sa usa ka police station. – EIM (BANAT NEWS)