Text sa 'kidnapping' nakahasol na
CEBU, Philippines - Gikaalarma na sa kapolisan ang mga text messages kalabot sa mga nahitabong pagpanagit og mga bata sa nagkadaiyang parte sa lalawigan sa Sugbo.
Si Cebu Provincial Police Office (CPPO) Officer-In-charge Louie Oppus miingon nga nakamugna na og kahasol sa publiko ilabi na sa mga ginikanan ang maong mga walay basehang mga report.
“Alarming gyud siya kay naka-create man og panic,” pasabot pa ni Oppus. Susama sa nahitabo sa syudad sa Toledo nga ang usa ka bata ang mihunong na sa pagtungha tungod sa kahadlok nga dagiton.
Tungod niini gimandoan ni Oppus ang mga hepe sa kapolisan sa kalungsoran nga bisitahon ang nagkadaiyang mga tunghaan sa ilang hurisdiksyon lakip na ang merkado ug simbahan.
Matud pang Oppus makatabang kini aron subling mabalik ang pagsalig sa publiko sa mga polis ug hingusgan ang koordinasyon sa mga ahensya sa Department of Education (DepEd); Local Government Units (LGU’s); Department of Social Welfare and Development (DSWD) aron makatabang paghatag og hustong impormasyon sa mga ginikanan ug kabataan.
Sa laing bahin, walay kamatuoran ang giingong pagsuway og dagit sa usa ka 7-anyos sa sitio Hinognawan sa barangay Lipanto sa lungsod sa Alegria sa mga sakay sa kolor itom nga sports utility vehicle niadtong Lunes sa buntag.
Nasuta gikan sa usa ka 63-anyos nga si Abondia Ygonia apohan sa giingong bata nga gisuwayan pagdagit nasaypan lang niya ang maong sakyanan kansang sakay igo ra diay mangihi sa daplin.
Tungod sa mga balitang adunay manignit og bata naratol kini ug nagpakitabang kini sa mga tawo, tungod niini mipasirit usab ang SUV palayo. - BANAT NEWS
- Latest
- Trending
