Dalaga gilugos sa espanyol; 15-anyos gi-rape sad

CEBU, Philippines - Nalandig sa tambalanan ang usa ka dalaga human giingong gilugos makaduha ka higayon sa usa ka Spanish sulod sa usa ka condominium nga nahimutang sa barangay Kamputhaw ning dakbayan niadtong Domingo sa hapon.

Ang biktima nagpangidaron og 20-anyos, molupyo sa barangay Guadalupe samtang ang Spanish 32 anyos giingong usa ka US citizen.

Ang biktima gi-imbitar sa maong langyaw pinaagi sa text pagbisita diha sa unit niini sa maong condominium matud pa ni Chief Insp. Michael Bastes sa pakighinabi sa Banat News.

Apan sa pagpanuktok sa biktima kalit kining gibunlot pasulod ug giguroy sa katre dayon gisugdan og lugos duha ka higayon nga giingong nakaingon sa pagkagisi sa iyang bilahan.

Human niini mipauli ang biktima ug nangayo og tabang sa iyang igsuon kinsa midangop dayon sa kapolisan.

Matud pa ni Bastes nga ang igsuon na niini maoy misumbong kanila samtang gidala sa tambalanan ang biktima tungod kay nagkadugo kini og maayo.

Ang biktima nianang pagkasunod adlaw kauban ang kapolisan mibalik sa condominium diin positibong mitumbok sa suspek nga maoy milugos kaniya.

Tungod niini gidakop ang suspek sa kapolisan ug gidala sa Fuente Osmeña Police Station ug niadtong adlaw’ng Martes gipasakaan na og kaso diha sa piskalya.

Samtang sa laing bahin, naputol ang pagkauhaw sa unod sa usa ka 58-anyos nga lalaki nga mipahimulos sa usa ka 15-anyos nga amang nga ilang silingan human kini dakpa sa kapolisan niadtong Lunes.

Ang biktima mitumbok sa silingang 53-anyos (pangalan gipugngan aron di mailhan ang biktima) nga pito na ka higayong milugos kaniya ug katapusan siyang nahilabtan niadtong Lunes apan nahibaw-an kini sa iyang apohan.

Ang apohan sa biktima midangop diha sa Gender and Development sa barangay Camputhaw ug midangop ngadto sa kapolisan, nasuta nga hatagan og P10 sa suspek ang bata matag mahuman og lugos.

Ang suspek nadakpan sa mga polis diha sa ilang balay ug gipasakaan og kaso kagahapon.  - BANAT NEWS