Bata 'gisignit' sa Toledo City

CEBU, Philippines - Na-ukay ang kapulisan ug daghang mga ginikanan ang nangalisang sa dakbayan sa Toledo kagahapong adlawa human sa balitang adunay 11-anyos nga batang babayeng gidagit sa itom nga sakyanan pipila ka metros gikan sa Talavera Elementary School sa barangay Talavera alas 7:30 sa buntag.

Usa ka nagpailang si Eugene Masong, 26, ang mitawag sa telepono sa kapulisan alas 8:05 sa buntag ug maoy mipahibawo sa nahitabong kidnapping alas 7:30 sa buntag.

Matud ni SPO3 Carmelito Hornales, desk officer sa Toledo City Police dihang nahinabi sa Banat News gawas ni Masong aduna pay usa ka 11-anyos nga batang lalaki nga nakakita usab sa maong hitabo diha sa may taytayan sa Talavera.

Gikatahong usa ka batang babaye nga nagsuot og raincoat ang kalit gihunongan sa itom o kolor blue nga sakyanan (giingong usa ka van-type) ug may dakuong bukton nga puti ang mibunlot sa bata pagpasakay sa maong sakyanan dayong bulhot padulong sa Balamban.

Tungod sa maong report, si Chief Insp. Jovito Canlapan daling mimando sa pag-roadblock sa mga silingang kalungsoran apan wala silay nadakpang susamang sakyanan.

Si Canlapan sa pakighinabi sa mga tigbalita kagahapon mibutyag nga dili pa nila kompirmado ang maong report apan ilaha karong gisubay ang mga balay sa 126 ka mga tinun-ang absent kagahapon sa Talavera Elementary School.

Si Janette Gonzalez ang officer-in charge sa maong tunghaan nga gikahinabi sa mga tigbalita mibutyag nga nianang buntag daghan na ang absent gumikan sa kadautan sa panahon apan tungod sa maong balita mas midaghan ang absent tungod kay gipanguha sa mga ginikanan ang ilang mga anak.

Hangtud kagahapon sa hapon, wala pay ginikanang midangop sa ilang buhatan nga nagpahibalong nawad-an sila og anak. - (BANAT NEWS)