Berger, Esdrelon gipabuhian

CEBU, Philippines - Hingpit nang gawasnon ang duha ka mga gipasanginlang suspek sa pagdagit ug pagpatay sa 6-anyos nga bata sa barangay Calajoan lungsod sa Minglanilla nga sila si Sven Erik Berger ug Karen Castro Esdrelon human nga gi-dismiss sa Provincial Prosecutors Office ang kasong complex crime nga Kidnapping with Homicide tungod sa kahuyang sa ebidensiya.

Sumala pa nila Assistant Provincial Prosecutors Marlon Atillo ug Marvin Dela Peña sa ilang napulo ka pahina nga resolusyon nga giaprobahan usab ni Deputy Provincial Prosecutor Joseph Berciles nga ang gisumiter nga ebidensiya ilabi na nga personal identification sa mga minor de edad nga mga testigos sa kapolisan sa lalawigan sa Sugbo dili paigo aron ipasaka ang maong kaso batok sa duha ngadto sa korte.

Sigon pa ni Atillo ug dela Peña nga ang gidusong mga hulagway sa National Bureau of Investigation-7 gikan sa CCTV camera sa sulod sa Waterfront Lahug Hotel and Casino maoy bug-at nga ebidensiya nga sila si Berger ug Esdrelon didto sa maong hotel dihang nahitabo ang pagdagit ug pagpatay kang Ellah Joy Pique.

Subay sa pagbasura sa maong kaso, ang Provincial Prosecutors mimando dayon sa kapolisan sa lalawigan sa Sugbo nga buhian dayon si Berger ug Esdrelon.

Si Atty. Salvador Solima nga maoy abogado sa duha nga daan nang nagtuong inosente ug lig-on ang ilang ebidensya batok sa pasangil sa mga polis nagpasalamat pagkalingkawas sa iyang mga kliyente.

Sila si Berger ug Esdrelon dihang nahinabi sa mga sakop sa media miingon nga dili na sila mopadayon pa sa ilang unang tinguha nga mopasaka og kaso batok sa kapolisan nga midakop ug mikustodiya kanila kay igo na kaayo nila nga nakalingkawas sa maong kaso.

Human gi-release sa kustodiya sa kapolisan, miadto sila si Berger ug Esdrelon sa Cebu Provincial Police Office aron pagkuha sa ilang mga kabtangan ug milahos sa airport aron moadto na sa nasud sa Norway.

Samtang ang abogado sa pamilyang Pique nga si Atty. Daryl Amante mitug-an sa mga sakop sa media pinaagi sa text nga ilang iapelar ang maong kaso ngadto sa Department of Justice hangtud na sa Korte Suprema.

"We are not satisfied. We will file an appeal to the Department of Justice Manila for its reversal and if still not satisfied we will go to the Supreme Court on petition for certiari under rules 65 (of) rules of court,” sigon pa sa text message ni Atty. Amante. (/EIM) - (BANAT NEWS)