Bugno sa mga hubong babaye sakpan

CEBU, Philippines - Gidakop ug gibilanggo ang usa ka Amerikano human kini giingong nasakpan sa akto nga nagpahubo sa gibanabanang pito ka mga babaye, tulo niini mga menor de edad nga iyang gipaunay og romansa samtang siya nanguha og litrato o video sa usa ka lugar sa sitio Looc sa barangay Malbago lungsod sa Daanbantayan niadtong Domingo sa alas 11:00 sa buntag.

Ang gidakop ang 34-anyos nga Amerkanong taga West Virginia U.S.A. nga kasamtangang nagpuyo sa barangay Pungtod sa dakbayan sa Bogo.

Samtang ‘giluwas’ ang tulo ka mga menor de edad nga nagpangidaron og 14, 16 ug 17-anyos nga mga molupyo usab sa maong barangay ug ang laing upat ka babayeng pulos mga hamtong na ang pangidaron nga mga taga dakbayan sa Sugbo.

Matud ni PO2 Alfredo Mandal, imbestigador sa Daanbantayan Police Station dihang nahinabi sa Banat News kini miingon nga ang kapitan sa barangay Malbago nga si Virgilio Mesa uban sa mga sakop sa Barangay Intelligence Network pinangulohan ni Danilo Villegas maoy nakasikop sa suspek ug miluwas sa mga biktima.

Sumala pa nga nahitabo ang law-ay nga buhat diha sa usa ka hawan nga umahan sa maong lugar nga nakit-an sa pipila ka mga residente kinsa dali usab nga misumbong.

Subay sa inisyal nga imbestigasyon, gibayran og kwarta sa maong langyaw ang mga babaye aron maghubo ug mopahigayun og “cat fighting” kon romansahay sa pulos mga babaye.

Samtang ‘nagbugno’ ang mga babaye nagpunay usab og kuha og litrato ang langyaw sa iyang camera.

Si kapitan Mesa ug mga sakop sa BIN nakaakto gyud sa mga babaye nga hubo ang mga lawas ug nag-unay og romansahay hinungdan sa pagsikop nila sa maong Amerkano.

Sumala pa nga pag-abot diha sa presinto kusganong mihimakak ang maong langyaw sa alegasyon sa midakop kanila ug nangangkong nag-camping lang sila sa maong lugar.

Sa report sa TV Patrol Central Visayas giingong nangangkon ang langyaw nga mga higala niya ang mga babaye ug kalingawan lang nila ang pagkuha og video footage sa ‘catfight.’

Gikatahong aduna say laing babaye nga gipangita ang kapolisan nga taga barangay Pasil sa dakbayan sa Sugbu nga giingong maoy mi-recruit sa mga babaye bugti sa bayad nga P2 mil matag usa ug dugang bayad ini og kahuman sa ilang taping.

Sa paghimo ning balita gihikay na ang kasong human trafficking nga ipasaka batok sa langyaw kansang pangalan nailhan pinaagi sa iyang passport nga nakuha sa iyang posesyon. (EIM)  -(BANAT NEWS)