'Barugg' sa City Hall

CEBU, Philippines - Pormal na gilusad kagahapon ang opisyal nga newsletter sa kagamhanan sa Siyudad sa Sugbo nga ”Barugg” nga nagkahulogan nga Bayanihan Advocates Rallying for Unity and Good Governance.

Ang Public Information Officer (PIO) sa siyudad nga si Carlo Dugaduga maoy nagdumala sa maong publikasyon.

Sumala pa ni Dugaduga nga mao kini ang unang higayon nga adunay newsletter ang dakbayan sa Sugbo.

Tumong niini nga mahibaw-an sa mga empleyado sa Cebu City Hall ug sa mga opisyales sa barangay ang mga kalihukan sa siyudad.

Sa susamang higayon, masuta usab sa publiko ang mga proyekto nga gipatuman sa mga opisyales sa siyudad.

Samtang si Mayor Michael Rama mihangop sa maong proyekto ni Dugaduga gumikan kay timaan kini nga panahon na aron mahibaw-an sa publiko nga nagbaha ang mga proyekto sa kagamhanan alang sa katawhan.

Mabasa usab ang mga artikulo gikan sa nagkadaiyang departamento ug sa mga konsehal nga buot mosaysay sa ilang mga maayong nabuhat ngadto sa ilang mga konstituwente.

Ang PIO mopaimprinta og 20,000 ka kopya matag buwan sa Barugg aron iapod-apod sa mga nagkadaiyang departamento sa City Hall ug sa 80 ka mga barangay.(WC) (BANAT NEWS)