Rama uyon CCMC imbestigahon

CEBU, Philippines -  Gipadayag ni Mayor Michael Rama nga bukas siya sa posibilidad nga ilusad sa iyang buhatan ug ang konseho kalabot sa mitumaw nga problema sa Cebu City Medical Center human mapaso ang tulo ka mga batang bag-ong natawo dihang mibuto ang bombelya nga suga sa lawak nga nahimutangan sa mga biktima.

Nagkanayon si Rama nga kinahanglang masuta ang hinungdan sa hitabo ug kinsa ang mga tawo nga angayang manubag niini.

Matud sa mayor nga gikinahanglan ang pagtinabangay sa tanan aron masulbad ang kaso .       

Sa pagkakaron giplano pa kun kanus-a sugdi ang maong imbistigasyon sa buhatan sa mayor ug sa konseho.

Samtang lig-ong gibarogan sa pamunuan sa CCMC nga aksidente ang nahitabo ug andam silang moabag sa ilusad nga imbestigasyon.

Gipaubos na usab karon sa inventory ang mga kahimanan sa CCMC aron dili na masubli ang nahitabo.

Kasagaran sa mga kasangkapan sa CCMC mga karaan na kaayo ug angayan na nga ilisan busa giklaro sa mayor nga mao kini ang angay nga tutokan sa iyang administrasyon aron matabangan ang mga panginahanglanon sa nahisgutang tambalanan.

Sila si City Administrator Jose Marie Poblete , City Attorney Joseph Bernaldez ug city health officer Tomas Fernandez maoy pipila sa mga personalidad nga gitahasan ni Rama nga mohimo sa dinaliang imbestigasyon sa nahisgutang hitabo. (BANAT NEWS)