Oppus temporaryong hepe sa CPPO

CEBU, Philippines - Temporaryong pangulohan ni Sr. Supt. Louie Oppus ang Cebu Provincial Police Office samtang nangita pa og ikahulip sa mi-resign nga si Sr. Supt. Erson Digal.

Si Oppus kinsa nakigkita kagahapon sa tanang hepe sa kapolisan sa kalungsoran sa lalawigan sa Sugbu ug sa special units miingon nga gipaabot pa ang desisyon sa Camp Crame kun kinsay ibutang sa CPPO.

Niadtong Pebrero 25, si Chief Supt. Ager Ontog Jr. mipadala og suwat ngadto sa Camp Crame nga nagpahibalong si Oppus una ang ibutang isip officer-in charge sa CPPO samtang wala pa makapili si Gob. Gwendolyn Garcia og ikahulip kang Digal.

Si Oppus nga maoy kasamtangang Deputy Regional Director for Operations sa PRO-7 nakadawat sa kamandoan gikan sa Crame kagahapon sa buntag sa pag-asumir isip OIC sa CPPO.

Ang PRO-7 aduna nay gipadalang tulo ka mga pangalan sa Camp Crame nga kandidato sa pagka-direktor sa CPPO nga mao sila si Sr. Supt. Mariano Natu-el gikan sa Police Community Relations, Sr. Supt. Ramon Rafael sa Criminal Investigation and Detection Group-7 ug Sr. Supt. Caranza sa Regional Human Resources Development Division (R1) sa PRO-7.

Matud pang Oppus kun si kinsa nila ni Natu-el ug Caranza ang mapilian mao kini hulipan ni Digal sa ilang biyaang pwesto diha sa PRO-7.(/EIM) (BANAT NEWS)