CEBU, Philippines - Mipadayag og suporta ang mga negosyante sa dakbayan sa Mandaue sa plano sa kagamhanan nga tanoman og kahoy ang daplin sa karsada, limpyohan ug patahumon.
Atol sa panagtagbo nga gitambongan sa mga negosyante ug sa mga opisyal sa kagamhanan sa dakbayan didto sa City Agriculture Office, ang mga representante sa walo ka establisemento mipasalig nga andam silang mananom og kahoy, ug mga misitas sa atubangan sa ilang mga establisemento aron moanindot kini tan-awon.
Gisaad nila nga aron mamintenar ang kahinlo ug katahom, sila gyud mismo ang molabay sa ilang basura ug dili pasagdang magkatag sa palibot sa ilang balay patigayon nga dili mahipos sa mga basurero.
Ang mga negosyanteng mipasalig nga mosuporta sa maong proyekto naglakip sa F.F. Cruz, and Company Inc., Parkmall, Cebu Doctor’s University, Nito’s Auto Supply Inc., and Taft Property, University of Cebu Lapulapu-Mandaue, San Miguel Brewery, Nature Spring ug Coca-Cola Inc. tanan sa maong dakbayan. - BANAT NEWS