Nag-exhibition, poste gipatumba

CEBU, Philippines - Usa ka drayber nga nagpa-exhibition pagpadagan sa iyang sakyanan mitumba saposte sa kuryente sa South Coastal Road, sa barangay Lawaan II, sa dakbayan sa Talisay kagahapon sa buntag.

Ang drayber sa prime mover nga mitumba sa poste giila sa kapolisan nga si Reggan Porcelas, 24, nga taga sitio Wireless, barangay Subangdaku, dakbayan sa Mandaue.

Si PO2 Hornales sa traffic division sa Talisay mibutyag nga nagpaingon sa dakbayan sa Sugbo, gikan sa lungsod sa Oslob ang prime mover dihang pag-abot sa maong lugar ug nakita sa drayber ang nagpuwa nga stop signal suga sa trapiko.

Gumikan sa iyang kaabtik, ang mga saksi nagkanayon nga gipa-exhibition sa suspetsado ang iyang sakyanan pinaagi sa kalit nga paghunong nga pinababag niini.

Busa wala kaikyas ang poste sa kuryente sa center island sa karsada ug dihang nawiktan kini sa lawas sa trak midiretso pagkatumba ug mibad-ay sa traffic light.

Maayo nalang kay walay sakyanan ug mga tawo ang dapit nga natumbahan sa maong poste, busa gibati og kahayahay ang dughan sa maong drayber.

Giugkat usab dayon sa mga nakasaksi ang maong poste busa wala makahatag og kalangan sa trapiko ang maong hitabo.

Apan mibilib ang mga tawo sa kahaniti sa maong drayber mipahunong pababag sa iyang sakyanan bisan hinay kaayo ang dagan niini.  - BANAT NEWS