'Fratman' gitusak og bala namatay

CEBU, Philippines - Patay nang napalgan sa ilang silingan ang usa ka 31-anyos nga lalaki human kini pusila sa wala mailhing tawo kagahapon sa kaadlawon diha sa sitio Hill Top, barangay Lagtang, dakbayan sa Talisay.

Ang biktima mao si Edmundo Romares, residente sa nahisgutang dapit nakaangkon og mga samad pinusilan sa walang bahin sa ilong, walang bahin sa dughan, ilawom sa walang bukton ug walang bitiis.

Si Romares daling gidala ngadto sa Talisay City District Hospital apan patay na kining naabot sa nahisgutang tambalanan.

Na-recover nila ni PO3 Ferdinand Pablo, PO2 Ivan Ray Juarez ug PO1 Jundave David diha sa lugar nga nahitaboan ang duha ka kabhang ug usa ka slug sa kalibre .45 nga pistola.

Si David nga nahinabi sa Banat News kagahapon nagkanayon nga base sa ilang nahipos nga report si Romares gikan kini sa gipahigayong disko sa kasaulogan sa pista sa barangay Lagtang.

Gituohan nga posibleng gisundan o giatangan sa kriminal ang biktima dihang milakaw na kini paingong mopauli.

Si David nagkanayon usab nga usa sa motibong ilang gituohan sa hitabo mao ang frat war tungod kay ang biktima usa ka sakop sa Alpha Kappa Rho fraternity.  - BANAT NEWS