Nadasmagan sa sundalo patay

CEBU, Philippines - Usa ang patay ug laing usa ang kritikal human ang motorsiklong ilang gisakyanan aksidenteng nabanggaan sa usa ka Isuzu Fuego pickup truck kagahapon sa alas 4:15 sa kaadlawon diha eskina sa General Maxilom Avenue ug M.J. Cuenco Avenue, sa barangay Carreta, dakbayan sa Sugbo.

Patay diha-diha ang air force reservist nga si Bernie Depositorio, lumad nga taga Cadiz, Negros Oriental ug kritikal ang kahimtang ni Air Force Sergeant Tito Villena, 34, lumad nga taga Lapasan Cagayan de Oro.

Ang duha parehong nadestino diha sa Mactan Benito Ebuen Air Base sa dakbayan sa Lapu-Lapu.

Ang Isuzu Fuego nga nagtangag sa plakang WRV-921 gimaneho ni Private First Class Rachelle Semblante, 29, sakop sa Philippine Army ug lumad nga taga Bukidnon nadestino diha sa Central Command.

Base sa imbestigasyon sa kapolisan, si Semblante gikan sa barangay Pasil, dakbayan sa Sugbo nagbiyahe paingon unta ngadto sa Centcom.

Si Semblante paingon na untang motabok diha sa dalan sa General Maxilom Avenue dihang naigo niini ang motorsiklo nga gisakyan sa mga biktima.

Si Villena maoy nagmaneho sa Kawasaki nga motorsiklo nga nagtangag sa plakang GK-5347 samtang si Depositorio nag-angkas.

Si PO2 Edgardo Becoy sa Cebu City Traffic Operation Management nagkanayon nga kusog kaayo ang dagan sa motorsiklo ug wala na makapreno si Semblante dihang nagkaabot sila sa eskina.

Ang motorsiklo giingong nalatayan sa pickup human kini mabanggai nga nakaingon sa pagkalagpot sa mga sakay niini.

Si Villena nakaangkon og bali sa tuong bitiis ug kadaot sa iyang ulo ug daling gidala ngadto sa Central Command Hospital sa Camp Lapu-Lapu, barangay Lahug, dakbayan sa Sugbo sa mga sakop sa Emergency Rescue Unit Foundation (ERUF) nga miresponde.

Si Depositorio human mahiling sa ERUF gideklarar nga patay na tungod sa grabeng kadaot sa ulo ug sa kalawasan.

Si Semblante temporaryo kining gidetiner diha sa CITOM apan matud pa ni Becoy nga ang mga labaw sa duha ka habig ug ang igsuon sa usa sa mga biktima giingong nagsabot-sabot na kun aregluhon ba ang nahitabo.  - Ug Ria Mae Booc sa The Freeman (BANAT NEWS)