Langyaw nga may kaso limpyohon na

CEBU, Philippines - Gihagit ni kanhi Dangerous Drugs Board (DDB) Undersecretary Paul Clarence Oaminal ang kagamhanan sa Pilipinas ilabina ang mga sakop sa kongreso nga sugdan niini ang paglimpyo sa mga langyaw nga nalambigit sa palusot sa gidiling drugas.

Kini samtang giuswag sa makadiyot ang gitakda na nga pagbitay sa tulo ka Pilipino nga bitayonon didto sa China gumikan sa pagpayuhot sa ginadiling drugas.

Apan matud ni Oaminal nga salikwa-ot kaayong paminawon nga ang Bureau of Immigration (BI) mihatag pa og higayon nga maka-estar dinhi sa nasud ang gitawag nga MINAKO KOMUKAI ang usa ka Japanese actress nga gipangita sa mga otoridad sa Japan gumikan sa pagka-konbikto niini sa paghupot og amphetamine.

Matud ni Oaminal subo kaayong palandungon nga bisan og gipahibawo na sa mga otoridad sa Japan ang BI nga dili na angay lugwayan ang pag-estar dinhi sa maong actress apan wala tagda sa BI ang maong awhag.

Gani padayon niining gitugotan nga malugwayan ang visa sa maong actress hangtud sa Marso 21, 2011 gikan sa paghiabot niini dinhi sa Pilipinas niadtong Enero 21, 2011.

Dugang ni Oaminal nga dili balidong rason ang argumento sa BI nga way pormal nga request nga ilang nadawat gikan sa mga otoridad sa Japan nga ipa-deport ang maong artista.

Gani gihisgotan sab ni Oaminal ang daghang mga Pinoy nga gipa-deport sa Japan ug ubang mga nasud tungod kay nakahimo sila og salaod bisan wala kapasakai og kaso (Darrel A. Carumba/WC) (BANAT NEWS)