Mandaue kulang og firetruck

CEBU, Philippines - Ang kakulang sa firetruck sa Bureau of Fire Protection (BFP) sa dakbayan sa Mandaue maoy nag-una nga suliran sa masinatiang kapakyas sa kabomberohan pagpawong dayon sa kayo kun may sunog nga mahitabo sa maong dakbayan.

Mao kini gibutyag ni Fire Chief Inspector Rogelio Bongabong, fire marshall sa dakbayan sa Banat News kinsa miingon nga isip usa ka highly urbanized nga syudad, ang Mandaue nagkinahanglan unta og 13 ka mga firetruck sa pagtubag sa sunog.

Busa ang kasamtangang unom ka firetruck , kuwang pa og pito aron maoy mokombati sa kayo kun may sunog nga mahitabo sa maong dakbayan. Busa tungod sa kakuwang sa sakyanan, ang mga sunog sa Mandaue muogdaw una og mga dagkong edipisyo una mapawong sa hingpit .

Gipasabot niya nga gikan sa first alarm ngadto sa second alarm kun makita niya nga kusog ang pagkuyanap sa kayo, mangayo dayon sila og ayuda sa katawhan aron magtinabangay pagpawong sa kayo.

Matud pa niya nga dako kaayo og ikatabang sa ilang buhatan ang dugang pang mga firetruck , ingon man ang gilaraw nilang pagtukod og mga fire substation nga dali makatubag sa higayon nga adunay sunog nga mahitabo.

Matud pa niya nga ang mga fire substation nga ilang idugang anha ibutang sa barangay Subangdaku ug barangay Banilad sanglit ang maong dapit daghang panimalay ug mga establisamento nga angay kapanalipdan panahon sa sunog. (Romeo T. Limpangog/WC)  (BANAT NEWS)