CEBU, Philippines - Mikagulkol sa prisohan ang usa ka tawo nga nadakpan sa akto nga nagyupyop og linikit nga marijuana didto sa sitio Palma sa barangay Looc, dakbayan sa Mandaue sa miaging gabii.
Ang nagpahayahay karon sa prisohan mao si Raymond Quino, 34 , minyo nga nagpuyo sa maong dapit, samtang ang misikop kaniya mao si PO1 Arvin Palonpon sa kapolisan sa Presinto 5 sa Opao Police Station.
Si PO2 Rolito Estorbo sa kapolisan sa nahisgotang presinto nga nahinabi sa Banat News miingon nga samtang naglakaw si PO1 Palonpon sa nahisgotang dapit, nakapanimaho kini og aso sa marijuana.
Dihang gisusi niya ang maong dapit nakita niini ang suspetsado nga naghithit sa maong ginadiling druga hinungdan nga iya kining gisignit.
Nasakmit ni PO1 Palonpon gikan sa suspek ang bag-o lang nadagkotan nga marijuana busa gipaslak dayon kini sa prisohan.
Kasong paglapas sa Section 11 kon Comprehensive Dangerous Act of 2002 maoy gipasaka batok sa maong suspetsado. (BANAT NEWS)