CCPO na maoy pabantayon sa Carreta

CEBU, Philippines - Itugyan na sa Cebu Metropolitan Cathedral ang pagdumala sa seguridad sa Carreta Cemetery ngadto sa mga polis aron mao nay mobantay ug mosulbad sa tensiyon human sa nahitabong pagpamusil sulod sa maong sam-ang niadtong milabay’ng adlaw.

Nasayran nga niadtong Biyernes, gipusil patay ni Graciano Sandoval, sakop sa Alesna Security and Detective Agency (ASDA) gamit ang usa ka 12-gauge shotgun ang usa ka Jeffrey Paz, human ang naulahi hubog nga namugos pagsulod sa guardhouse sa sam-ang.

Si Msgr. Roberto Alesna, parish priest sa Cathedral uban sa mga kadagkoan sa kapolisan nga gipangulohan ni Supt. Pablo Labra daling mipahigayun og meeting aron hisgutan ang nahitabong insidente.

Ang assistant cemetery administrator ug maoy migawas nga tigpamaba sa Cathedral nga si Adonis Quitoy nagkanayon nga naalarma sila sa maong panghitabo, apan dili niya masegurado nga may kalabutan ba kini sa nagpadayon usab nga suliran dinha sa maong sam-ang kabahin sa mga illegal settlers nga dugay nang gipapahawa sa simbahan.

“Kato nga incident, dili ta ka pin-point kung related ba ni sa isyu sa mga nahibiling illegal settlers nga nagmagahi gihapon paghawa sa cementery,” matud pa ni Quitoy. “Andam hinuon mi mohatag og hinabang sa biktima kun moduol sila namo.”

Matud pa ni Quitoy nga sa wala pa ang maong insidente, pipila na usab ka taho ang ilang nadawat gikan sa ilang mga gipabantay diha sa Carreta nga mireklamo sa pipila ka pagpanghudlat gikan sa mga namuyo.

Tungod niini, nahukman sa simbahan nga inay magbutang og guwardiya, mangayo lang una sila og tabang gikan sa kapolisan aron mao nay mobantay sa seguridad sa sementeryo.

“As of now, i-pull out lang sa namo among mga staff aron usab sa ilang safety ug amo nalang gipangayo ang assistance sa kapolisan nga maoy mubantay didto,” dugang pa ni Quitoy. Nasayran usab nga nahugno ang katapusang sabot-sabot tali sa simbahan ug sa mga nahibiling illegal settlers sa maong sam-ang dihang gibalibaran sa naulahi ang gitanyag nga tabang sa simbahan bugti sa pagpahawa kanila. (Lemuel Maglinte/EIM) (BANAT NEWS)