Drayber sa van 'gipatiran' sa piskal

CEBU, Philippines - Usa ka drayber sa usa ka freezer van ang giingong gipatiran ni Assistant City Prosecutor Beinvenido Mabanto ug gipabilanggo pa gyud kini diha sa Subangdaku Police Station sa dakbayan sa Mandaue human madasmagi ang sakyanan sa maong opisyal niadtong Biyernes sa hapon.

Ang aksidente nahitabo diha sa parking lot sa usa ka mall sa Reclamation area sa nahisgutang siyudad dihang ang Mitsubishi Canter freezer van nga gimaneho ni Darwin Dabon, taga barangay Tisa, dakbayan sa Sugbo nakasaghid sa sakyanan ni Mabanto nga usa ka Kia Sorento.

Base sa imbestigasyon sa kapolisan sa Mandaue City Traffic Division nagparada diha sa parking lot sa Parkmall ang sakyanan sa maong opisyal dihang nasaghiran sa nagmaniobrang si Dabon.

Si Mabanto pagkahibawo sa maong insidente gikan sa gwardiya sa mall daling misusi sa iyang sakyanan ug gipadakop si Dabon.

Base sa natala sa police report si Dabon miangkon sa iyang sayop ug nangayo kini og pasaylo apan giingong adunay mga testigong nakakita nga gipatiran ni Mabanto ang bitiis sa maong drayber.

Kini hugtanon hinuong gihimakak sa maong opisyal ug mirason nga sayop gyud ang gihimo ni Dabon.

“Nag-park akong sakyanan, gidam-agan niya unya mibalhin dayon og parkingan murag wa lay nahitabo. Unya naa may nakakita ug ang security guard misumbong nako, bastos gyud tawhana, kabalo sad baya siya nga gi-prohibit to nga lugar kay pedestrian lane to unya naa pay naka-block nga traffic barrier unya mo-parking pa gyud siya,” matud pang Mabanto.

Si Dabon giisyuhan og Temporary Operators Permit ni PO1 Roselle Campo tungod sa kalapasan nga reckless driving ug damage to property. Ang asawa ni Dabon nanghinaot nga mapasaylo ni Mabanto ang iyang bana ug pagawson na unta kini karong Lunes.

Si Mabanto miangkon nga siya maoy misugo nga idetener si Dabon ug karong Lunes pasakaan gyud niya og kaso ang maong drayber. (Brenda D. Batuto ug Flor Z. Perolina sa The Freeman)