Fishing Code buot ipabasura sa mananagat

CEBU, Philippines - Gisugat og lihok protesta sa mga militanteng pundok dinhi sa Sugbo ang ika-25 ka tuig nga kasumaran sa paghandom sa Edsa People Power 1 Revolution kagahapong adlawa.

Kini gipangulohan sa Bayan Muna Central Visayas ug Anakpawis nga sayo pa sa buntag milusad sa ilang protesta sa atubangang bahin sa Kapitolyo ug pagkahuman didto sa may Fuente Osmeña rotunda ug mi-martsa paingon sa dalan Colon ug didto gitapos ang maong rally sa usa ka hamubong programa sa pagkaudto.

Gibanabana nga moabot lang ngadto sa 30 ngadto sa 50 ka mga tawo ang misalmot sa maong protesta.

Ang secretary general sa Bayan Muna Central Visayas Armand Perez nanawagan sa pagbasura sa Fisheries Code nga gihulagway nila nga nakapaapiki og samot sa kahimtang sa mga mananagat dinhi sa nasud ug ingon man ang pending nga petisyon alang sa gipangayo nga dugang usbaw sa suholan sa pamuo sa Sugbo. (EIM)

Wala sab kalikayi sa Bayan Muna ang pagbanat ngadto sa administrasyong Aquino nga gihulagway nila nga pakyas pagtuman sa mga planong kausaban nga iyang gisaad.   - (BANAT NEWS)