Berger way extention - BID-7

CEBU, Philippines - Wala tuguti sa Bureau of Immigration kagahapon ang hangyo ni Sven Erik Berger nga ma-extend ang iyang pagpuyo dinhi sa Pilipinas samtang nag-atubang pa siya og kaso may labot sa kamatayon ni Ellah Joy Pique.

Sa BID-7 director Casimero Madarang nagdumili sa pag-extend sa tourist visa ni Berger tungod sa rason nga wala niya kinahanglanang mangayo niini sanglit aduna pa kini kaso dinhi sa nasud.

Si Berger nga usa ka Norwegian gipasanginlang lakip na iyang uyab nga si Karen Esdrelon nga maoy midagit ug mipatay kang Pique, kini gipanghimakak hinuon sa duha.

Sa laing bahin, pormal nang nadawat kagahapong adlawa sa pamilya sa 6-anyos nga batang gidagit ug gipatay nga si Ellah Joy Pique ang hinabang nga salapi gikan sa buhatan ni Gob. Gwendolyn Garcia.

Ang amahan ni Ellah Joy nga si Renante ug inahan nga si Ligaya kuyog sa laing anak maoy midawat sa P5 mil diha sa Kapitolyo.

Wala diha ang gobernador maong si Provincial Administrator Eduardo Habin maoy nitunol sa tseke ngadto sa magtiayong Pique.

Sigon pa ni Renante Pique nga dako kaayo sila og pagpasalamat sa Kapitolyo sa mga hinabang nga gidalit kanila.

Apan si Renante masulob-ong nitumbok nga nagpadayon pa gihapon sila nangita sa idlas nga hustisya sa linuog nga pagdagit ug pagpatay sa ilang anak.

Gipadayag ni Renante ang iyang kasagmuyo sa kapolisan sa lalawigan sa Sugbo tungod sa giingong pagdalidali og dakop sa duha ka mga suspetsado nga nakapalubog na hinuon sa imbestigasyon sa kamatayon ni Ellah Joy.

“Daghang ni-intra sa imbestigasyon nisamot na hinuon kalubog. So ang ako lang kun gusto sila motabang man gani sa pag-imbestigar dapat kana gyud tinuoray ug kinasingkasing nga tabang sa pagsulbad sa kaso ni Ellah Joy, di kay magpataka og dakop sa mga tawo nga wala gyuy labot. Ang ako lang nga molutaw ang hustisya nga tinuoray,” sigon pa ni Renante nga nakahinabi sa mga sakop sa media.

Apan wala hinuon kini moklaro kun unsay iyang ipasabot sa katapusang bahin sa iyang pamahayag kung may pagduda ba kini karon sa gipasakaang gitumbok nga mga suspek nga sila si Karen Esdrelon ug Sven Erik Berger.

Ang National Bureau of Investigation nakakuha og video footage sa duha diha sa Waterfront Hotel sa Lahug nianang mga oras nga gidagit ang bata ug gisuportahan usab sa duha ug uban pang ebidensya nga sila inosente sa gipasangil kanila.

Samtang si Ligaya miingon nga hangtud karon nagpabiling dili normal ang ilang kinabuhi sanglit daghan pa man ang mga awtoridad nga nagbantay kanila kay wala pa hingpit nga masulbad ang kaso sa pagkamatay sa ilang anak.