Tulisang de motor sikop

CEBU, Philippines - Usa ka gidudahang tulisan nga magsakay og motorsiklo nadakpan sa kapolisan atol sa checkpoint ug nakuhaan kini og armas didto sa sitio White Road ,sa barangay Inayawan, ning siyudad sa Sugbo sa miaging gabii.

Ang suspetsado mao si Robert Ouano, 37, taga sitio Cabancalan sa barangay Bulacao, siyudad sa Sugbo kinsa nakuhaan og .45 kalibre nga armas nga adunay usa ka magazine nga puno sa mga bala.

Si Sr. Insp. Edgar Nacario, hepe sa Pardo Police Station maoy nanguna sa checkpoint sa nahisgutang lugar dihang ilang nasigpatan ang usa ka motorsiklo nga giangkasan sa tulo ka tawo ug usa niini mao si Ouano.

Sa dihang nakabantay ang drayber sa motorsiklo sa checkpoint, mihunong kini apan tungod sa karatol nahagbong si Ouano ug gibiyaan siya sa duha niya ka mga kauban kinsa mipabulhot sa motorsiklo.

Busa si Nacario uban sa kaubang mga polis, miduol dayon kang Ouano ug sa dihang ila kining girikisa nakuhaan siya sa maong armas.

Si Ouano nga napakyas pagpakita og mga papeles sa maong armas diha-diha gisikop ug gibalhog sa karsel sa Pardo Police Station.

Nagduda ang kapulisan nga posibleng ang grupo ni Ouano maoy mangigoay ug tigpanulis sa lugar sa Inayawan, Pardo ug kasikbit nga mga dapit panahon sa kagabhion nga gamit ang motorsiklo.

Ang kapolisan sa Pardo miawhag karon sa mga nabiktima sa tulisang de motor sa nangaging buwan o kaha niining pipila ka adlaw nga sil-ingon nila ang dagway ni Ouano aron kapasakaan og kaso kining tawhana yawat nalang maiban-ibanan ang mangtas kaayong mga tulisang de motor ning dakbayan.  - BANAT NEWS