Anak sa polis nadakpang nangawat

CEBU, Philippines - Usa ka giingong anak sa polis sa dakbayan sa Talisay, nabalhog sa prisohan sa kapolisan sa dakbayan sa Mandaue human kini hisakping nangawat sa mga butang sulod sa usa ka Internetan sa barangay Casuntingan, dakbayan sa Mandaue sa miaging hapon.

Ang suspetsado giila nga si Gerjane Abatayo, ulitawo,   lumad nga taga barangay Linao, lungsod sa Minglanilla ug giilang anak sa usa ka polis nga nadestino sa dakbayan sa Talisay.

Sumala sa kapolisan sa Casuntingan nga nasakpan ang suspetsado dihang migawas kini sa Internetan nga nagbaguod sa daghan kaayong mga kahimanan sa internet uban ang mga cell phone ug salapi sa maong establisamento.

Si SPO1 Genaro Lambayan sa Presinto 4 sa Mandaue City Police Office (MCPO) sa barangay Casuntingan miingon nga milabay sa ilang buhatan ang suspetsado nga kusog kaayong nagdagan dala ang nagkalainlaing butang.

Busa ilang gipugngan dihang namatikdan nilang gigukod kini sa mga estambay sa maong lugar ug nabati ang singgit sa naggukod nga ipadakop kini kay nangawat.

Si Cherryl Torre, 28, nga maoy nagbantay sa Internetan mibutyag sa kapolisan nga siyay unang nakamatikod sa suspetsado nga nagkinagang sa pagdala sa nagkalainlaing mga kahimanan sulod sa Internetan sa paggawas niini busa misinggit siya ug nangayo og panabang sa mga estambay nga ipagukod ang suspetsado.

Ang suspetsado nga nakamatikod nga gigukod siya misuway og sakay og traysikol apan gipugngan siya sa mga polis sa Casuntingan Police Station nga nakamatikod nga nangawat siya. – WC (BANAT NEWS)